ಸಂಜೆ ಪ್ರಭ ಬಾರ್ಸಿಲೋನಾ: ಕೃತಕ ಬುದ್ಧಿಮತ್ತೆಯ ಯುಗವು ಟೆಲಿಕಾಂ ವಲಯಕ್ಕೆ ಕೇವಲ ತಂತ್ರಜ್ಞಾನದ ಅಪ್ಗ್ರೇಡ್ ಮಾತ್ರ ಅಲ್ಲ, ಬದಲಾಗಿ ಆರ್ಥಿಕತೆ ಮತ್ತು ವ್ಯವಹಾರ ಮಾದರಿಯ ಮರುಹೊಂದಿಕೆ ಆಗಿದೆ ಎಂದು ಜಿಯೋ ಪ್ಲಾಟ್ಫಾರ್ಮ್ಸ್ ಲಿಮಿಟೆಡ್ನ ಗ್ರೂಪ್ ಸಿಇಒ ಮ್ಯಾಥ್ಯೂ ಊಮ್ಮೆನ್ ಹೇಳಿದರು.
ಬಾರ್ಸಿಲೋನಾದ ಮೊಬೈಲ್ ವರ್ಲ್ಡ್ ಕಾಂಗ್ರೆಸ್ ನಲ್ಲಿ ಅವರು ಮಾತನಾಡಿದರು. ಜಗತ್ತು “ನಿಮಿಷಗಳು ಮತ್ತು ಬೈಟ್ಗಳನ್ನು” ಮೀರಿ “ಟೋಕನ್ಗಳು ಮತ್ತು ಇಂಟೆಲಿಜೆನ್ಸ್” ಹೊಸ ಆರ್ಥಿಕತೆಯನ್ನು ಪ್ರವೇಶಿಸುತ್ತಿದೆ. ಕೈಗಾರಿಕಾ ಯುಗವು ಉತ್ಪಾದನೆಯನ್ನು ಆಧರಿಸಿದ್ದರೆ, ಇಂಟರ್ನೆಟ್ ಯುಗವು ಸಂಪರ್ಕ ಮತ್ತು ಕ್ಲೌಡ್ ಒದಗಿಸಿತು. ಆದರೆ ಎಐ ಯುಗವು ಆರ್ಥಿಕ ಸಮೀಕರಣವನ್ನು ಸಂಪೂರ್ಣವಾಗಿ ಬದಲಾಯಿಸುತ್ತದೆ. “ಇದು ಅಪ್ಗ್ರೇಡ್ ಚಕ್ರವಲ್ಲ, ಇದು ಸಂಪೂರ್ಣ ಮರುಹೊಂದಿಕೆ”. ಜಾಗತಿಕವಾಗಿ ಎಐಯಲ್ಲಿ ಟ್ರಿಲಿಯನ್ ಡಾಲರ್ ಹೂಡಿಕೆಯು ಈ ಬದಲಾವಣೆಯ ಸಾಮರ್ಥ್ಯದ ಪ್ರಮಾಣವನ್ನು ಪ್ರದರ್ಶಿಸುತ್ತದೆ.
ಕಂಪನಿಯ ಮುಖ್ಯ ಆದ್ಯತೆ ಕುರಿತು ಮಾತನಾಡಿ ಈ ಬದಲಾವಣೆಯು ಟೆಲಿಕಾಂ ಉದ್ಯಮಕ್ಕೆ ದೊಡ್ಡ ಅವಕಾಶವನ್ನು ಒದಗಿಸುತ್ತದೆ. ಜಿಯೋ ತನ್ನನ್ನು ಕೇವಲ ನೆಟ್ವರ್ಕ್ ಪೂರೈಕೆದಾರನಾಗಿ ಅಲ್ಲ, ಬದಲಾಗಿ ಇಂಟೆಲಿಜೆನ್ಸ್ ಗ್ರಿಡ್’ ನಿರ್ಮಾತೃವಾಗಿ ನೋಡುತ್ತದೆ. ಟೆಲಿಕಾಂನ ಕರೆನ್ಸಿ ನಿಮಿಷಗಳಿಂದ ಬೈಟ್ಗಳಿಗೆ ಮತ್ತು ಈಗ ಟೋಕನ್ಗಳಿಗೆ ಬದಲಾಗುತ್ತಿದೆ. ನಾವು ಕೇವಲ ಅತಿದೊಡ್ಡ ಟೋಕನ್ ವಾಹಕ ಅಲ್ಲ. ಆದರೆ ಅತಿದೊಡ್ಡ ಟೋಕನ್ ಜನರೇಟರ್ ಆಗಲು ಬಯಸುತ್ತೇವೆ ಎಂದರು. ಟೋಕನ್ ಅಂದರೆ ಎಐ ಮಾಡೆಲ್ ಗಳು ಬಳಸಿಕೊಳ್ಳುವಂತಹ ಡೇಟಾದ ಯೂನಿಟ್ ಆಗಿರುತ್ತದೆ. ಟೋಕನ್ ಗಳು ಎಐ ಯುಗದಲ್ಲಿ ಹೊಸ ಕರೆನ್ಸಿಗಳಂತೆ ಪ್ರಾಮುಖ್ಯತೆ ಪಡೆಯಲಿದೆ ಎಂದು ನಿರೀಕ್ಷಿಸಲಾಗುತ್ತಿದೆ.
ಟೆಲಿಕಾಂ ಉದ್ಯಮವನ್ನು ನಿಮಿಷಗಳು, ಬೈಟ್ಗಳು ಮತ್ತು ಟೋಕನ್ಗಳ ಮೂಲಕ ವಿಸ್ತರಿಸಿ ಹೇಳಬಹುದು ಎಂಬುದನ್ನು ಗಮನಿಸಬೇಕು. ಆರಂಭದಲ್ಲಿ, ಆದಾಯದ ಆಧಾರವು ಧ್ವನಿ ಕರೆ, ಇದನ್ನು ನಿಮಿಷಗಳಲ್ಲಿ ಅಳೆಯಲಾಗುತ್ತಿತ್ತು. ನಂತರ ಡೇಟಾ ಬಂದಿತು, ಇದನ್ನು ಬೈಟ್ಗಳಲ್ಲಿ ಅಳೆಯಲಾಗುತ್ತಿತ್ತು, ಅಂದರೆ, ಗ್ರಾಹಕರು ಎಷ್ಟು ಬೈಟ್ಗಳನ್ನು ಬಳಸುತ್ತಾರೆ ಎಂಬುದರ ಆಧಾರದಲ್ಲಿ. ಭವಿಷ್ಯದಲ್ಲಿ, ಇದನ್ನು ಎಐ ಟೋಕನ್ಗಳಾಗಿ ಪರಿವರ್ತಿಸಲಾಗುತ್ತದೆ. ಇದು ಎಐ ಕಂಪ್ಯೂಟೇಶನ್, ಮಾದರಿ ನಿರ್ಣಯ (ಎಐನ ಉತ್ತರಿಸುವಿಕೆ), ಸ್ವಯಂಚಾಲಿತ ನಿರ್ಧಾರಗಳು ಮತ್ತು ಯಂತ್ರದಿಂದ ಯಂತ್ರಕ್ಕೆ ಸಂವಹನದಂತಹ ಇಂಟೆಲಿಜೆನ್ಸ್ ಸೇವೆಗಳನ್ನು ಒಳಗೊಂಡಿರುತ್ತದೆ.
ಜಿಯೋ ಭಾರತದಲ್ಲಿ ಧ್ವನಿ ಕರೆ ಮುಕ್ತಗೊಳಿಸಿತು ಮತ್ತು ಡೇಟಾ ಬೆಲೆಗಳನ್ನು ಪ್ರತಿ ಜಿಬಿಗೆ 9 ಸೆಂಟ್ಗಳಿಗೆ ಇಳಿಸಿತು, 52.5 ಕೋಟಿಗಿಂತಲೂ ಹೆಚ್ಚು ಬಳಕೆದಾರರಿಗೆ ಡಿಜಿಟಲ್ ಸಂಪರ್ಕವನ್ನು ತಂದಿತು ಎಂದು ಅವರು ನೆನಪಿಸಿಕೊಂಡರು. ಮುಂದಿನ ಗುರಿ “ಕಡಿಮೆ ವೆಚ್ಚದಲ್ಲಿ ಟೋಕನ್-ಪರ್-ವ್ಯಾಟ್” ಅನ್ನು ತಲುಪಿಸುವುದು. ಅಂದರೆ, ಕೈಗೆಟುಕುವ ಬೆಲೆಯಲ್ಲಿ ದೊಡ್ಡ ಪ್ರಮಾಣದ ಇಂಟೆಲಿಜೆನ್ಸ್ ಮೂಲಸೌಕರ್ಯವನ್ನು ನಿರ್ಮಿಸುವುದು.
“ಎಐ ಕಮಾಂಡ್ ಆರ್ಕಿಟೆಕ್ಚರಲ್ ಫ್ರೇಮ್ವರ್ಕ್” ಅನ್ನು ಉಲ್ಲೇಖಿಸಿ, ಭವಿಷ್ಯದ ನೆಟ್ವರ್ಕ್ ವಿಭಿನ್ನ ಪರಿಕರಗಳ ಸಂಗ್ರಹವಾಗಿ ಇರುವುದಿಲ್ಲ, ಆದರೆ ಏಕೀಕೃತ, ಸಂಯೋಜಿತ ಆರ್ಕಿಟೆಕ್ಟ್ ಆಗಿರುತ್ತದೆ ಎಂದು ಊಮ್ಮೆನ್ ಹೇಳಿದರು. ನೈಜ ಸಮಯದಲ್ಲಿ ಯೋಚಿಸುವ, ಸಂಘಟಿಸುವ ಮತ್ತು ಕಾರ್ಯ ನಿರ್ವಹಿಸುವ ವ್ಯವಸ್ಥೆಗಳನ್ನು ರಚಿಸಲು ಎಐ ಮತ್ತು ಟೆಲಿಕಾಂ ಮೂಲಸೌಕರ್ಯ ಒಟ್ಟಾಗಿ ಕೆಲಸ ಮಾಡುತ್ತದೆ ಎಂದರು.
ಅವರ ಪ್ರಕಾರ, ತಂತ್ರಜ್ಞಾನ ನಾಯಕತ್ವವು ಈಗ ಆರ್ಥಿಕ ನಾಯಕತ್ವವಾಗಿದೆ ಮತ್ತು ಅದು ಭವಿಷ್ಯದಲ್ಲಿ ರಾಷ್ಟ್ರೀಯ ನಾಯಕತ್ವವನ್ನು ನಿರ್ಧರಿಸುತ್ತದೆ. ಇಂಧನ, ಸಾರಿಗೆ, ಹಣಕಾಸು ಮತ್ತು ಭದ್ರತೆಯಂತಹ ಕ್ಷೇತ್ರಗಳಲ್ಲಿ ಬುದ್ಧಿಮತ್ತೆಯನ್ನು ಅಳವಡಿಸುವುದು ಅತ್ಯಗತ್ಯವಾಗಿರುತ್ತದೆ ಮತ್ತು ಇದು ಟೆಲಿಕಾಂ ಮೂಲಸೌಕರ್ಯವನ್ನು ಆಧರಿಸಿರುತ್ತದೆ.
ಎಐ ರೂಪಾಂತರವು ಕೆಲವರಲ್ಲಿ ಆತಂಕವನ್ನು ಉಂಟು ಮಾಡಬಹುದು ಎಂದು ಊಮ್ಮೆನ್ ಒಪ್ಪಿಕೊಂಡರು, ಆದರೆ ಇದನ್ನು “ನಮ್ಮ ಜೀವಿತಾವಧಿಯ ಅತಿದೊಡ್ಡ ಅವಕಾಶ” ಎಂದು ಕರೆದರು, ಈ ಬದಲಾವಣೆಯನ್ನು ಸ್ವೀಕರಿಸುವ ಮ್ಯಾನೇಜರ್ ಗಳು ಭವಿಷ್ಯದ ಆರ್ಥಿಕತೆಯಲ್ಲಿ ನಾಯಕರಾಗುತ್ತಾರೆ ಎಂದು ಹೇಳಿದರು.
